سامر أبو طالب يهاجم رامي صبري:«انت مبتردش على الرسايل واحنا مش بنشحت»

شن الملحن سامر أبو طالب هجوما حادا على الفنان رامي صبري، وذلك بعد الأزمة الأخيرة التي اتهم فيها الملحنين والشعراء بعدم التجديد في كتابتهم.

سامر أبو طالب يهاجم رامي صبري

وأوضح سامر أبو طالب في مقطع فيديو متداول له أنهما لم يتلقى رد من رامي صبري ويتعمد تجاهلهما، وقال: بقالنا كام يوم، زمايلي الملحنين والشعراء حاسين إن في تجاهل، وطلعوا اتكلموا وقالوا كلام من قلبهم، وأنا ضميت صوتي لصوتهم، والتجاهل هنا مش بنشحت من حد إنه يبص علينا أو يسمعنا، لأ، بنتكلم على إننا لما بنبعت لحد عارفنا ومسجل رقمنا، وفي بينا قعدات واشتغلنا مع بعض وبينا نجاحات، وفكرة إنك متردش أصلًا مش حلوة في حقك كنجم أو صانع، ممكن تقول مش عاجبني أو أي رد عادي، ده تقدير منك.

أضاف: بحب رامي صبري على المستوى الشخصي والفني، ومحدش جاب سيرتك أصلًا لا من قريب ولا من بعيد، أنت من الناس اللي طلعت هاجمتنا وقالت معندناش جديد، لأ إحنا متطورين ومتجددين، وبشوف أنا نفسي متميز في حتتي وألحاني، أنت بس اللي مبتفتحش الشات عشان تشوف غيرك بعتلك إيه، قبل ما تتهمنا شوف بس.

تابع: محدش جاب سيرتك أصلا لا من قريب ولا من بعيد، وأنت من الناس اللي مبتردش ولا بتفتح الشات، وإحنا متطورين ومبدعين، وأنا أشتغلت مع نجوم كبار زي الهضبة وتامر حسني وتامر عاشور.

رد رامي صبري بعد الهجوم الأخير عليه

كان حرص الفنان رامي صبري على الرد على الانتقادات التي تعرض لها بعد تصريحاته الأخيرة بشأن عدم رده على بعض الملحنين والشعراء الذين يتواصلون معه من أجل التعاون الفني، مؤكدًا أن حديثه تم تفسيره بشكل خاطئ.

وقال رامي صبري، في مقطع فيديو نشره عبر خاصية ستوري على حسابه بموقع إنستجرام: مش عارف فيه ناس متضايقة أوي إني كتبت ستوري بقول فيها إن الملحنين اللي بيبعتولي شغل مابيعملوش حاجات مختلفة، أيوة دي حقيقة، يعني أعملها وخلاص علشان هي بتتبعتلي؟.

وأوضح أن اختياراته الفنية تعتمد في المقام الأول على مدى اختلاف الفكرة وتميزها، مضيفًا: أنا بعمل الحاجات اللي شايفها من وجهة نظري إنها مختلفة وجديدة، فده مش المفروض يضايق حد.

وأكد الفنان أن حديثه لا ينتقص من موهبة أي من الملحنين أو الشعراء، مشيرًا إلى أن الأزمة لا تتعلق بجودة الأعمال المقدمة، وإنما بالمنافسة الكبيرة داخل سوق الغناء.

وأضاف: المشكلة مش في الملحنين والشعراء، كلهم كويسين، لكن إحنا كمطربين في السوق عددنا محدود، بينما الملحنين والمؤلفين عددهم كبير جدًا، وبالتالي طبيعي تكون فرص التعاون أقل.

كما وجه رامي صبري الشكر إلى تركي آل الشيخ على دعمه المستمر للفنانين، قائلًا: بشكر معالي المستشار على دعمه لينا دائمًا كفنانين، وأتمنى التوفيق للجميع.