“بفرحك وانت بتزعلني” جرأة محببة وبداية موفقة لرامي صبري

قال الناقد الموسيقي أحمد السماحي إن أغنية “بفرحك وانت بتزعلني” للمطرب رامي صبري فيها حالة من الجرأة، لكنها جرأة محببة ومش مزعجة، مؤكدًا إن رامي قدم من خلالها شكل مختلف عن لونه المعتاد، وده بالتعاون مع حازم إكس اللي بقى ليه بصمة واضحة في الفترة الأخيرة بعد نجاحاته مع أحمد سعد.

أحمد السماحي : “بفرحك وانت بتزعلني” جرأة محببة وبداية موفقة لرامي صبري

وفي تصريح لـ “مصر تايمز”، أوضح السماحي إن حازم إكس ارتبط مؤخرًا بالمونولوجات الغنائية اللي قدمها مع أحمد سعد وحققت نجاح كبير سواء في السنة اللي فاتت أو في ألبومه الجديد “فرفوش”، وده خلا تعاونه مع رامي صبري خطوة فيها جرأة فنية محسوبة وبداية موفقة.

وأضاف إن أغنية “بفرحك وانت بتزعلني” من كلمات وألحان حازم إكس، وتوزيع كوليبكس، والجيتار لـ أحمد حسين، بينما الميكس والماستر لهاني محروس، مؤكدًا إن الشكل الموسيقي في الأغنية مميز جدًا وعناصره متكاملة.

وتابع إن رامي صبري فنان متجدد وبيحاول دايمًا يقدّم ألوان مختلفة عن اللي قدمها قبل كده، وده بيخليه من أكثر المطربين تطورًا على الساحة الغنائية في الفترة الأخيرة.

واختتم السماحي كلامه بأن رامي صبري من أبرز المطربين على منصات الموسيقى في مصر والعالم العربي، بعد عمرو دياب، بفضل شغله المستمر وتطويره لنفسه، مشيرًا إلى إنه لسه من بدري نحكم على ألبوم “القمر” لأنه لسه ما نزلش كامل، لكن الأغنية دي تعتبر بداية موفقة ولطيفة، متمنيًا إن باقي الألبوم يكون فيه تنوع أكبر وأشكال موسيقية جديدة.