“ده اللي عندنا”.. مواطن يحذر من التعامل مع شركة تاج مصر للتطوير العقاري

حذر مواطن يدعى شريف أحمد، من التعامل مع شركة تاج مصر العقارية، مستعرضا تجربته الشخصية مع الشركة كأحد الملاك المتضررين، مستغيثا بوزارة الإسكان.

وقال صاحب المشكلة، عبر حسابه الشخصي: حابب أشارك تجربتي فالتعامل مع شركة تاج مصر للتنمية العقارية Taj Misr Developments، و أنبه المقبلين علي الشراء من الشركة.

وتابع: أنا مشتري معاهم من سنتين وكل الأقساط وكل حاجة بتدفع في معادها، والمفروض استلم خلال سنتين، واتي معاد استحقاق الصيانة مع الاستلام، ف رفضت الدفع لان محدش بلغني بالاستلام أو حتى تواصل معايا يوضح أسباب التأخير، وابتدا التعامل يكون فيه قله ذوق والكلام بنبره “ده اللي عندنا” ومفيش نظام، بحيث إنهم قاصدين إن العميل ديما يكون متلخبط وبيحتك بالإدارات المختلفة، رغم أن كل ده داخل الشركة وتعامل منتهي العشوائية.

واستطرد عن مشكلته مع شركة تاج مصر للتطوير العقاري:  كل ده أكيد عشان ضامنين حقهم كامل في العقد، بدون ما يوفوا بأي وعود للحقوق اللي عليهم، لدرجة إنهم وصلوني إن أفسخ وأتقبل الخسارة وخلاص، ولكن برضه مفيش أي توضيح لخطوات الفسخ وكيفية استرداد الفلوس وحاجة في منتهي العشوائية.

وتابع: والتجربة من الأول أصلا كانت سيئة، السيلز الخاص بالشركة بيبيع الهوا، ومش بيكون عارف بنود العقد ولا فاهم أي حاجة وبيوعد عالفاضي.