إياد مراد
أعربت الإعلامية عبلة سلامة عن استيائها من طريقة استقبال لاعبي المنتخب المصري بعد عودتهم، منتقدة تخصيص حافلة مكشوفة لهم في أجواء شديدة الحرارة، معتبرة أن ما حدث لا يليق بتكريم اللاعبين بعد المجهود الكبير الذي بذلوه خلال البطولة.
عبلة سلامة تنتقد استقبال لاعبي المنتخب
ووجهت عبلة سلامة رسالة عبر حسابها الرسمي على موقع تبادل الصور والفيديوهات القصيرة إنستجرام، سخرت خلالها من فكرة الاحتفال بالحافلة المفتوحة، مؤكدة أن اللاعبين كانوا بحاجة إلى الراحة والتقدير، واختتمت رسالتها بقولها: “إحنا آسفين يا رجالة”.
وكتبت: بجد تحية كبيرة جدا لصاحب الفكرة العبقرية دي.. عبقرية من النوع اللي تخلي الواحد يسأل: هو إحنا بنحتفل بالمنتخب ولا بننتقم منه ؟.
أضافت: تركبوا اللعيبة أوتوبيس مكشوف في عز الشمس والحر، ساعتين، وفي طريق صحراوي.. طب هو المنتخب عمل فيكوا إيه بالضبط ؟ ضايقكم في حاجة ؟.
تابعت: الناس راجعة من بطولة مجهدة بدنيا ونفسيا، والمفروض تتكرم وتتحضن، مش تتشوي على مهل تحت الشمس عشان كام صورة وفيديو ولقطة احتفال.
استكملت: أنا بجد نفسي أعرف مين قعد وفكر وقال: آه أحسن استقبال للأبطال إننا نلف بيهم ساعتين في الحر!.. ده مش استقبال أبطال .. ده برنامج تأديبي!.. احنا اسفين يا رجالة !.
عبلة سلامة تدافع عن محمد صلاح
دافعت الإعلامية عبلة سلامة عن لاعب المنتخب المصري محمد صلاح، وذلك بعد هجوم البعض عليه عقب مبارة مصر والأرجنتين.
وكتبت عبلة سلامة من خلال حسابها الرسمي عبر موقع تبادل الصور والفيديوهات القصيرة إنستجرام، قالت: “ابتدى الكلام السخيف من ناس مش هذكر أسماء.. احترامًا لسن بعضهم، وفي ناس تانية الحقيقة ما تستحقش حتى الرد، ابتدى الهجوم على محمد صلاح. مرة يقولك ما عملش حاجة ومرة يقولك ما قامش بدوره، ومرة يقولك ما كانش مؤثر!”.
أضافت: “هو بجد إيه ده يا جماعة؟.. حرام عليكم بقى، كفاية اللي اللعيبة حاسين بيه بعد الماتش.. صلاح قام بدوره، وكان بيقاتل، وصلاح، لأنه قائد المنتخب، فاهم كرة القدم على أعلى مستوى”.
تابعت: “راجل لعب سنين وسط أكبر نجوم العالم، وعارف عقلية اللعيبة، وعارف طريقة لعبهم، وعارف إمكانياتهم، وعارف حراس المرمى بيتحركوا إزاي، وبيفكروا إزاي.. صلاح في الملعب مش لاعب عصبي ولا مندفع، صلاح راجل تقيل، هادي، وخبرته كبيرة، وإلا ماكنش يبقي محمد صلاح واوعي حد يشكك في وطنيته.. حرام عليكم بجد”.
أردفت: “ولما ضحك بعد بعض قرارات الحكم المستفزة، ناس فهمتها غلط، أنا شايفاها ضحكة واحد فاهم إن مافيش فايدة في الاعتراض، وإن القرار اتاخد خلاص.. خبرة السنين هي اللي خلت رد فعله كده”.
استكملت: “وبعدين هو إحنا هنحمّل صلاح المسؤولية لوحده ليه؟ دي كرة قدم، مكسب وخسارة، والفريق كله قاتل لآخر ثانية، واللي شاف المباراة بعينه شاف إن كل واحد في المنتخب ساب اللي عنده في الملعب.. إهدوا شوية بقى وكفاية جلد في ولاد بلدكم”.
أختتمت:”بالنسبة لي، محمد صلاح قيمة كبيرة نفتخر بيها، وقائد يستحق كل الاحترام، وكل لاعبي منتخب مصر يستحقوا التحية والتقدير، مش الهجوم والتجريح.. شكرًا يا صلاح، وشكرًا لكل رجال منتخب مصر. رفعتوا راسنا، وهتفضلوا مصدر فخر لينا مهما كانت النتيجة”.
