شارك الفنان كريم فهمي في تقديم العرض الوثائقي والتاريخي لافتتاح مقر القيادة الاستراتيجية للقوات المسلحة المعروف باسم الأوكتاجون في العاصمة الإدارية الجديدة.
وجاءت تصريحات الفنان كريم فهمي لتسلط الضوء على هذا الصرح الاستراتيجي الكبير، حيث قال: ”عشان تحافظ على دولة بحجم مصر، القوة العسكرية لوحدها مش كفاية. لازم يبقى عندك رؤية أوسع، فهم أعمق، وقدرة على اتخاذ القرارات بدقة في اللحظة المناسبة. الدول الكبيرة اللي تاريخها بيمتد لآلاف السنين، بتفكر دايماً في اللي جاي.. في شكل الدولة.. في قدرتها على قراءة الخطر، والاستعداد لأي لحظة اختبار.”
وأوضح الفنان كريم فهمي: ”في عالم بيتغير كل ثانية، كان التحدي الأكبر للقيادة السياسية في القدرة على رؤية المستقبل، وتوقع الأزمات قبل ما تحصل. ومن هنا، ظهرت الحاجة لمركز قيادة استراتيجي، ومختلف ومتطور.. مركز بيجمع كل الخيوط في مكان واحد.. مركز بمثابة: ‘عقل الدولة المصرية’.”
وأكد: ”مقر القيادة الاستراتيجية للقوات المسلحة.. بجانب إنه مقر للجيش المصري، وبينافس أقوى مقرات الجيوش في العالم، هو كمان بيقدم لمصر منظومة قيادة وسيطرة واتصال وإدارة أزمات بشكل متطور وما حصلش قبل كده. المبنى قائم على تكوين ثماني واضح؛ 8 مباني رئيسية مرتبطة ببعضها، وفي قلبها مبنيين مركزيين للقيادة السياسية.”
وتابع: ”من بره بنشوف هندسة صارمة، بتعكس القوة والردع. ومن جوه، بتتكامل القيادة مع مراكز البيانات والاتصالات، مع إدارة الأزمات والمتابعة مع سرعة الاستجابة. ده غير إن البيانات كلها محمية في مراكز تحت الأرض.”
”التصميم الهندسي بيضمن قدرة عالية على مقاومة الانفجارات، والتصدي لأي هجوم جوي محتمل، بالإضافة لأنظمة دفاعية مضادة لأحدث الأسلحة. وأقمار صناعية مصرية بتخدم المقر بالمعلومات الاستخباراتية والاستطلاع.. قلعة محصنة، قادرة تصمد في أصعب السيناريوهات.”
”العقل البشري ما بياخدش قرارات فجأة؛ بيستقبل بيانات ويحللها ويدرسها كويس، فيقيم الخطر، وبعدين يطلع القرار. والقيادة الاستراتيجية بتشتغل بنفس المنطق، لكن على مستوى الدولة. وفي منتصف القيادة الاستراتيجية للقوات المسلحة بنشوف المبنيين المركزيين، وهنا بيتحول التصميم من مجموعة مباني لعقل متكامل يدير الدولة المصرية.”
سر رقم 8 في تصميم مقر القيادة الاستراتيجي؟
”الرمزية الأولى من العمارة المصرية القديمة، وتحديداً الهرم الأكبر، اللي العالم متعود يشوفه ككتلة بأربع أوجه، لكن في قراءة هندسية أعمق بتظهر مع الضوء والظل، وبيظهر فيها 8 أوجه. وكأن كل وجه شايل جواه تفاصيل بتبين عبقرية المصري القديم وهو بيحول الهندسة لمعنى ورسالة. رقم 8 حاضر كمان في تصميم المركز لكن من بوابة العمارة الإسلامية، وده بنشوفه في النجمة الثمانية، اللي بترمز للنظام والتوازن والدقة الهندسية.”
وأوضح كريم فهمي: ”التحفة المعمارية دي بتجمع تلات طبقات من الهوية المصرية في صورة واحدة: مصر القديمة بجلالها وثباتها، مصر الإسلامية بهندستها، وتكملها القيادة السياسية في مصر بمنطق مختلف، بيستغل إمكانيات الحاضر عشان يبني المستقبل.”
واختتم قائلا: ”عشان كده، القيادة الاستراتيجية للقوات المسلحة هي انعكاس لرؤية الجمهورية الجديدة، في عهد الرئيس عبد الفتاح السيسي. الرؤية اللي دايماً شايفه أبعاد المشهد، وفاهمة إن الدولة الحديثة زي ما محتاجة قوة تحميها، محتاجة عقل يربط مؤسساتها، وينظم استراتيجيتها، ويوحد قرارها. مقر القيادة الاستراتيجية للقوات المسلحة.. عقل الدولة المصرية.”
